राष्ट्रियतालाई तिलाञ्जली दिएर ओलीले साम्राज्यवादीसँग साँठगाँठ गरे : राजमो उपाध्यक्ष आलम

टेकराज भुसाल,
मङ्सिर ७, सुपादेउराली अनलाइन बुटवल ।
राष्ट्रिय जनमोर्चाका उपाध्यक्ष बद्रे आलमले बर्तमान सरकार सत्ता जोगाउन विदेशी साम्राज्यवादीहरुलाई खुशी पार्न लागिपरेको बताउनुभएको छ ।

२२ राजनीतिक दलको संयुक्त आयोजनामा आइतबार बुटवलमा भएको विरोध प्रदर्शनलाई सम्बोधन गर्दै उपाध्यक्ष आलमले सत्ता रक्षाका लागि ओली सरकार साम्राज्यवादीहरुका विभिन्न सर्त स्वीकार गर्दै हिँडेको आरोप लगाउनुभयो ।

नेता आलमले प्रचण्ड–माधव गुटबाट आफ्नो सत्ता जोगाइराख्न प्रधानमन्त्री ओलीले राष्ट्रियतालाई तिलाञ्जली दिएर भारत र अमेरिकी साम्राज्यवादसँग साँठगाँठ गरिरहेको बताउनुभयो ।

‘केपी ओलीलाई आफ्नो सत्ता उनकै पार्टीको अर्को गुटले खोस्छ कि भन्ने ठुलो पिर छ’ आलमले भन्नुभयो, ‘त्यसकारण सरकार भारतीय साम्राज्यवादको सेवा गर्न कालापानी लगायतका अतिक्रमित भूमिको कुरा गर्न छोडेको छ भने अमेरिकी साम्राज्यावादलाई खुशी पार्न एमसीसी पास गर्न लागिपरेको छ ।’

नेता आलमले सरकार भ्रष्टाचारीहरुको संरक्षक बनेको आरोप पनि लगाउनुभयो । दुई तिहाईको शक्तिशाली सरकारले जनताका लागि धेरै काम गर्नसक्ने वातावरण भएपनि सरकारका मन्त्रीहरु आफैँ भ्रष्टाचारमा चुर्लुम्म डुबेको उहाँले बताउनुभयो ।

रुपन्देहीमा क्रियाशील ९ दलको आयोजनामा बुटवलमा एमसीसी लगायतका असमान सन्धिसम्झौताको खारेजी, कालापानी–लिपुलेक–लिम्पियधुरालगायतको देशको अतिक्रमित भूमि फिर्ता, कालापानिबाट भारतीय सेना फिर्ता, भ्रष्टाचार, महङ्गीको विरोध, लगायतका विषय समेटी विरोध प्रदर्शन भएको हो । 

कार्यक्रममा नेकपा (मसाल) का रुपन्देहीका प्रवक्ता नारायण जिसी, नेकपा (क्रान्तिकारी माओवादी) का नेता समीर केसी, नेकपा (माले) का लुम्बिनी प्रदेश सचिव चन्द्रकान्त आचार्य, देशभक्त जनतान्त्रिक मोर्चाका सचिव मदिम वली, राष्ट्रिय जागरण परिषद् नेपालका केन्द्रीय सदस्य चित्रबहादुर थापाले सम्बोधन गर्दै यो संयुक्त आन्दोलन कुनै पार्टी विशेष नभई राष्ट्रियता, जनतन्त्र, जनजीविकाको आन्दोलन भएकोले सम्पूर्ण जनता एकजुट भएर आन्दोलन सहभागिताका लागि आग्रह गर्नुभएको थियो।

यो समाचार पढेर तपाईलाई कस्तो लाग्यो ?

Supadeurali Online

लेखक बाट थप

प्रतिक्रिया दिनुहोस !

सम्बन्धित समाचार