बागलुङ । सामुदायिक विद्यालयको शैक्षिक सुधारमा विशेष योगदान पुर्याए बापत बुटवल कालिका क्याम्पसका क्याम्पस प्रमुख घनश्याम पाठकलाई दिल-गंगा प्रधान स्मृति कोषले सम्मान गरेको छ ।
सोमबार बागलुङमा आयोजित कार्यक्रममा कोषका अध्यक्ष काजि रोशनराज भण्डारी र जिल्ला प्रशासन कार्यालय बागलुङका प्रमुख जिल्ला अधिकारी रोशनी कुमारी श्रेष्ठले पाठकलाई दोसल्ला र कदरपत्रले सम्मान गर्नुभएको हो ।
गलकोट नगरपालिका – ९ हरिचौर, चरौदी, बागलुङमा जन्मनुभएका पाठकले २०४७ सालदेखि २०५५ सालसम्म पृथ्वी माध्यमिक विद्यालय हरिचौरमा र २०५५ सालदेखि २०७७ सालसम्म कालिका मानवज्ञान माध्यमिक विद्यालयमा शिक्षक र प्रधानाध्यापक भएर सेवा गर्नुभएको थियो ।
पाठक २०७७ सालदेखि बुटवल कालिका क्याम्पसको क्याम्पस प्रमुखको रुपमा क्रियाशिल हुनु हुन्छ । सम्मानित व्यक्तित्वको बारेमा समाजसेवी देव बहादुर श्रेष्ठले परिचय राख्नु भएको थियो ।
दिल-गंगा प्रधान स्मृति कोषका अध्यक्ष काजि रोशनको अध्यक्षतामा भएको कार्यक्रमको स्वागत कोषका संरक्षक दीपक चन्द्र प्रधानले र संचालन सचिव अगम पालिखेले गर्नु भएको थियो । बुबा दिल प्रसाद श्रेष्ठ र आमा गंगा श्रेष्ठको स्मृतिमा छोराहरु दीपक चन्द्र प्रधान, प्रकाश प्रधान, डा दिपेश प्रधान, प्रताप प्रधान र छोरी शुभकामना श्रेष्ठले विसं २०६१ सालमा दिल-गंगा प्रधान स्मृति कोष स्थापना गरेका थिए ।
