अर्घाखाँची । आज ३२ औँ अन्तर्राष्ट्रिय अपाङ्गता दिवस अर्घाखाँचीको भुमिकास्थान–१० धनचौरमा पनि मनाइएको छ । यो बर्षको नाराः दिगो विकास लक्ष्य प्राप्तीको प्रतिवद्धता, अपाङ्गता भएका व्यक्तिको अपनत्व र नेतृत्व सहितको ऐक्यवद्धता तय गरिएको थियो । 
कार्यक्रममा भुमिकास्थान–१० का कार्यबाहक वडाध्यक्ष टामलाल भट्टराईले अपाङ्गता भएका व्याक्तीहरुको लागि राज्यले छुट्टै कानुन बनाएपनि पूर्ण कार्यान्वयन हुन नसकेको बताउनु भएको थियो।
त्यस्तै सत्यदेवी आधारभूत विद्यालयका प्राचार्य बिष्णु बन्जाडेले अपाङ्गहरु विशेष क्षमताका हुने र अरु सामान्य व्यक्तिभन्दा फरक र कमजोर नहुने बताउदै अपाङ्गहरुलाई समाजले हेर्ने नजर बदल्नुपर्ने बताउनुभयो।
कार्यक्रममा अपाङ्ग महासंघ जिल्ला सहसचिव प्रेमलाल भट्टराई, श्रृजनशिल अपाङ्ग विकास केन्द्रका जिल्ला सदस्य बिष्णु प्रसाद भट्टराई,जनजागृती मा.वि.धनचौरका प्र.अ. पिताम्बर खनाल र धनचौर स्वास्थ्यचौकी इन्चार्ज शिव प्रकाश जि.सी.लगायतले मन्तव्य राख्नुभएको थियो । 
अपाङ्गता भएका व्यक्तिहरूलाई विकासको मूलधारमा ल्याउन शिक्षा, स्वास्थ्य र सुरक्षा जस्ता क्षेत्रमा प्रतिनिधित्व गराउने गरि बातावरण सिर्जना गर्नुपर्नेमा उहाँहरुको जोड रहेको छ । श्रृजनशिल अपाङ्गता समिति धनचौरका अध्यक्ष पवित्रा भुसालको अध्यक्षता, वेलकुमारी सोमैको स्वागत मन्तव्य र रेमलाल भट्टराईको संचालनमा कार्यक्रम गरि अपाङ्गता दिवस मनाइएको हो ।
भुमिकास्थान–१० का वडा सदस्य, हुलाक, प्रहरी सहित अन्य सरकारी निकायका प्रतिनिधि तथा अन्य सरोकारवालाको उल्लेख्य सहभागितामा कार्यक्रम सम्पन्न भएको हो ।
